Ein hoffer ac adeiladu

Peilonau rydyn ni'n eu defnyddio

Mae’r peilonau yn yr aliniad yn cynnig uchder cyfartalog o 28.5 metr. Dyma’r peilonau delltwaith lleiaf sydd ar gael i ni i drosglwyddo'r cyfanswm pŵer sy’n cael ei gynhyrchu. Mae’r aliniad presennol yn cynnwys o ddeutu 171 o beilonau ac ar gyfartaledd 280m rhyngddynt.

Prif nodweddion peilonau delltwaith:

• Technoleg sydd wedi’i phrofi, sydd i’w gweld mewn cymunedau ledled y DU
• Wedi’u dylunio i fod yn dryloyw, gan helpu i leihau effeithiau gweledol
• Addas ar gyfer tirweddau tonnog caeedig, gan y byddai’r bryniau’n gweithredu fel cefndir, gyda llai o’r peilon yn cael ei weld uwchben y nenlinell
• Gallu gwrthsefyll amodau tywydd eithafol, fel gwyntoedd cryf a rhew yn ffurfio ar y dargludyddion
• Maent yn bodoli mewn gorlifdiroedd ledled y wlad a byddwn yn sicrhau ein bod yn defnyddio dulliau adeiladu priodol yn yr ardaloedd sensitif hyn

Adeiladu’r cysylltiad

Byddai’r rhan fwyaf o’r offer y byddai ei angen arnom, gan gynnwys y cydrannau ar gyfer y cysylltiad, craeniau i adeiladu’r cysylltiad, a’r holl ddeunyddiau ar gyfer gwaith dros dro (fel compownd gwaith a ffyrdd mynediad), yn cael eu cludo ar lorïau confensiynol. Byddem hefyd angen faniau a cheir i fynd â gweithwyr yn ôl ac ymlaen i'r safle ac yn rhagweld y bydd angen rhai cerbydau mwy i gario offer.

Bydd yn cymryd tua dwy flynedd i adeiladu a phrofi’r cysylltiad, gydag amser ychwanegol i adfer y tir a’i adfer i’w ddefnydd blaenorol. Ar unrhyw un adeg, mae'n debygol y bydd nifer o adrannau gweithio ar hyd y llwybr.

Mae ein gwaith fel arfer yn digwydd fesul cam. Byddai pob elfen o’r prosiect yn cael ei hadeiladu yn dilyn pedwar prif gam.

Fel arfer, byddem yn gwneud y canlynol:

• Sefydlu safleoedd adeiladu, drwy lefelu’r tir a gosod compowndau gwaith a ffyrdd mynediad o nifer o ffyrdd cyhoeddus
• Adeiladu’r cysylltiad
• Profi’r holl offer gan sicrhau ei fod wedi’i adeiladu’n gywir cyn ei wneud yn fyw ar foltedd uchel
• Clirio ac ailosod y tir, a cheisio plannu planhigion ychwanegol i sgrinio offer lle bo angen

Ffiniau'r prosiect

Pan fyddwn yn cyflwyno ein cais am ganiatâd, bydd angen i ni gynnwys yr holl dir sydd ei angen arnom.

Bydd hyn yn cynnwys seilwaith parhaol, fel peilonau. Bydd hefyd yn cynnwys gwaith dros dro fel ffyrdd mynediad, compowndau gwaith a safleoedd adeiladu o amgylch ein seilwaith. Mae hyn yn golygu na fydd gan yr holl dir sydd wedi’i gynnwys yn ein ceisiadau seilwaith parhaol arno.